الزواج ... لكن !!!!

[منابر النور]

][ السلام عليكم ][





أم فهد : ياوليدي يافهد ليمتى بتقعد جذي بدون زواج ؟؟

فهد : تو الناس خليني أستانس :emot177: بشبابي .. لاحقين .. خليني أخلص دراستي :emot22: ..

أم فهد : لا لاتقول جذي العمر يركض وأبي أشوف عيالك قبل لاأموت .. وأبيك متهني ومستانس .

فهد : بعد عمر طويل يالغالية .. لا تقولين هالحجي كل هذا علشان زواج ..!!!يمه .. خلاص عيل
ولايهمج ولاتزعلين وإنتي بعد نقي إلى تبينها .

أم فهد : صج كلوووووولوووش .أفا عليك البنت عندي .

فهد : باسم الله متى :ask: !! تبين فكتي بالهسرعة أكيد بتقطين وراي سبع صخرات :D !؟

أم فهد : لاشدعوة ياوليدي لازم انقيها نقوه .. مختارت لك من زمان خوووش بنت سنعة وبنت
عايلة مادحينها لي ناس .. وأعلمك بالتفاصيل باجر .

فهد : الله يتمم على خير إنتي فصلي وآنا ألبس .. :king: الله يخليج لي يالغالية .








( في اليوم الثاني )







محمد : فهود شفيك متكدر ؟؟؟ موعلى عوايدك !!

فهد : آه .. الوالدة تحن تبي تزوجني .. وأنا حاس إني موقد المسؤولية !!! ودراستي ليلحين

ماخلصتها .. وماأشتغل ...!! وباجر الله اعلم شلون صايره زوجتي ..!! بالتحملني وإلا لأ.

محمد : لا .. زواج .. لايحوشك .. :eek: !!! باجر تييك وحده تكدر حياتك واتخرب عيشتك ..!! وحنه ورنه !!!

فهد : الله ..!! ليش فكرتك جذي إلا يقول متزوج من 10 سنين .!!!

محمد : بس أحب أعيش حر .. !!

فهد : والله مايندرى عنك !!! الله يسهل ويوفقنا أنا متأكد بتغير رايك مع الأيام .وحتى بالنسبة لي اعتقد مسألة وقت وكل شي يتغير !!

محمد : إن شاء الله .. الله يهديني :p






( فهد رجع البيت )





أم فهد : فهد تعال يما أبيك ..

فهد : تامرين أمر ..

أم فهد : سأل عن البنت .. وكلمت الأم اطلعوا خوش ناس بروح أشوفها أول وتالي إنحدد يوم إنت تشوفها ..

فهد : الله يسهل إن شاء الله ..







( رجعت الأم وشافتها وإسألت عنهم وتمت النظرة الشرعية )






أم فهد : ها شرايك فيها ؟؟

فهد : البنت ماعليها كلام وحياويه ماشاء الله .. بصراحة اعجبتني :) ..!!

أم فهد : ألف مبرووك .. تستاهل كل خير .. ناطرين الخبر منهم .. وأكيد بوافقون ..




( بعد ثلاثة أيام )



مكالمة هاتفية بين (أم فهد ) و (أم مها )


أم فهد : ها بشري إختي أم مها إن شاء الله خير

أم مها : كل خير إن شاء الله إحنا موافقين على فهد .. وسألنا عنا خوش ولد وكل من يقول والنعم .

أم فهد : الله يسلمج .. جزاج الله خير .

أم مها : بس عندنا شروط !!!

أم فهد : شنو إهيا شروطكم ؟؟؟ وإحنا حاضرين ..

أم مها : والله أول شرط بنتي مهرها 10.000 + الشبكة + نبي نسوي عرس + نبي لها شقة تسكن بروحها .. أعتقد هذا شوي على بنتي حشاشت يوفي ..!!

أم فهد : :eek: ........ !!!!! ......... بس يا أم مها أنا مع ولدي ساكنين بروحنا وأهو وحيدي ..!!
وأهو طالب من وين ييب له هالمبلغ .. !!! واشلون يعيش بنتكم .. توقعنا تطلبون مثل الكل 4.000 بس موهالمبلغ .. والمفروض تشترون الريال ..


أم مها : إحنا شارين الريال بس مانبي نبيع بنتنا ..!!! وإذا ماموقادرين على الشروط .. ليش يتزوج ؟؟؟


أم فهد : ماهقيتها منج ياأم مها الولد شافها واعجبته .. !! وعجبها !!

أم مها :سامحينا وجزاج الله خير الله يوفق فهد ببنت الحلال ..

أم فهد إنصدمت ..!! ( وإنتهت المكالمة )

فهد : ها يما بشري شقالت ؟؟؟

أم فهد : وافقوا ..

فهد : زين الحمد لله .. بس شفيج يما شكلج متكدرة عسى ماشر ؟؟؟

أم فهد : ها ... مالك نصيب بهالبنت ..!!

فهد : :v-angry: شنوووو .... لييييييش ؟؟؟؟ عقب ماشفتها واعجبتني صارت مومن نصيبي .. ليش ؟؟ يما اشصاير ؟؟؟

أم فهد : الأم طالبه مهر خيالي غير إنها تبي شقة حق بنتها تسكن بروحها ... !!!

فهد : ..!!!!! شنو انا قاعد على بنق :v-angry: .. البنت تستاهل !!!! بس من وين أييب أبوق .. لااني ملينير ولااني قاعد على بنق .. الله يسامحهم .. خلاص يما فكرة الزواج بشيلها من بالي ... اكمل دراستي أحسن لي :cry2: ..
مايفكرون هالأمهات والأبهات إلى يطلبون هالطالبات شلون يتكون عيشت بنتهم !!!
حسبي الله ونعم الوكيل ..!!









تعليقكم ..

من أحد القصص الغريبة أيضا إلى سمعتها عن طمع الوالدين .. إن أحد الآباء يزوج بنته من أكثر من رجل وإهي ماتدري وياخذ المهر ويطلقها وياخذ المأخر و هم وإهي ماتدري .. !!!


1- هل يوجد لدينا غلاء في المهور وفي الطلبات للزواج ؟؟ وهل يؤثر على الشباب وعلى المجتمع ؟؟

2- لما يتصور بعض الشباب الحياة الزوجية كما تصورها محمد مع إنه لم يجرب الزواج ؟؟

3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟

4- هل ممكن إن في شباب يتعقودن من هذه المواقف ؟؟

بارك الله فيكم :)

[بــاااايــعـها]

يسعدني اكون اول رد =)

اشكرك اختي على هالموضوع المميز والله

والله غلاء المهور صاير شي مو طبييعي!!
بس بالنسبة للشقه اتوقع انه البنت من حقها تطلب مكان تعيش لحالها هذا رايي =)

واتوقع الواحد افضل يكون نفسة على قولتهم بعدين يتزوج عشان ما يلتعوز ويلعوز بنت الناس معاه : )

[بحريني88]

السلام عليكم ورحمة الله وبركاته
الاخت الفاضله منابر النو جزاكم الله خير ..
وكأنكم تعلمون بأني على ابواب الخطبة بإذن الله تبارك وتعالى ..
فعلا اصبح هم المهر الشغل الشاغل الذي يفكر فيه الشاب .. فأنا كشاب افكر بهذا الامر واعلم به ولكن على يقين ان لو اخترت ذات خلق ودين من عائلة طيبه سوف يتفهمون الامر ..
اروي لكم قصتي
كنت اكلم اختي وامي عن هذا الامر .. وردوا قالوا لي كلام خلاني اغير رايي ..
يعني مبالغ ماكنت متوقعه ومن بعض الكلام ان الشبكه على الاقل لازم بــ1200 دينار والمهر اقل شي 2000 دينار والحفله لزام بــ1000اقل شي واللبس ووووو !!
هذول هلي هلون يقولون لي شلون عيل الناس !!
لكن انا صرفت عن كلامهم وقلت لهم لو اخترت ذات خلق ودين لن يكون هذه طلباتهم ولو ان بعضهم لا يهتم الا بالمال !!
فنسأل الله العفو والعافيه والتيسير والتوفيق .. دعواتكم لنا ..
وجزاكم الله خير (( اعذروني لم اعطي الموضوع حقه تماما ولي عوده بعد ان انتهي من البحوث الكثيره والامتحانات التي ليست في وقتها وبعض الامور الخاصه واعطيكم بعض الحلول واذكر بعض القصص التي تقترب من هذا الموضوع ))
والسلام عليكم ورحمة الله وبركاته
دعواتكم

[منابر النور]

بايعها : حياكم الله .. وجزاكم الله خير على المرور

والله غلاء المهور صاير شي مو طبييعي!!

فعلا في مشكلة عند البعض لكن مايقدرها !!.. وكأن المسألة بيع وشراء موزواج وعشرة عمر !!
الله يهديهم ..

اتوقع انه البنت من حقها تطلب مكان تعيش لحالها

صحيح لكن إذا كان الزوج وحيد عند أمه .. صعبة يتركها أما في غيرها من الحالات ممكن وبالعكس افضل .. نتمنى منكم تكملة الإجابة على الأسئلة ..

بارك الله فيكم

[بوعمار]

لي عوده باذن الله للتعقيب

[بــاااايــعـها]

نتمنى منكم تكملة الإجابة على الأسئلة ..




حاضر اختي

بالنسبة لمحمد اكيد صارت عنده هالفكرة من الناس الي يمشي معهم يعني حطوا بمخه الكلام الي هو قاله لفهد وهم اخذوا هالفكرة من شخص كانت تجربة بالزواج فاشله ومن وسائل الاعلام الي كل ما طق عود بحصى قالوا الزواج سجن ووجع راس <<< يلا سلام !!؟؟


اكيييد راح يتعقدون لانه راح يواجهم هالموقف كثيييير

وينا عن حديث الرسول علي الصلاة والسلام (اذا اتاكم من ترضون خلقه ودينه فزوجوه)

اكرر شكري لك اختي على الموضوع المهم : )

[منابر النور]

بحريني 88 : حياكم الله وجزاكم الله خير على المرور ..
نسأل الله لكم التوفيق والسعادة وأن يرزقكم الله بالزوجة الصالحة ..

ان لو اخترت ذات خلق ودين من عائلة طيبه سوف يتفهمون الامر ..
صحيح .. المفروض إن أهل البنت يشترون الرجل الخلوق الملتزم بدينه وهو الأساس
في عوائل ماشاء الله مايهتمون بالفلوس .. لكن في ناس تقولك 4 ألاف إلى يعطونهم الحكومة حق الشباب شتسوي .. فعلا كل شي صار غالي !! .. لكن المفروض إذا بزيد الشي يزيد بالمعقول ..
وعلى حسب الإمكانيات ..

هذول هلي هلون يقولون لي شلون عيل الناس !!
فعلا أهما يحدثونك بكلام واقعي ويشوفون ويسمعون يمكن بمواقف مرت .. لكن مثل ماقلنا مو الكل يطلب هالطالبات ويتشرط ويبالغ .. لأ على حسب مقدرت الزوج وإمكانياته .

وننتظر العودة ..
بارك الله فيكم

[منابر النور]

بوعمار : بإذن الله .. ننتظر العودة

بايعها : جزاكم الله خير على التكملة .. صحيح أعتقد إن الإعلام لعب دور كبير في تشويه نظرة الزواج لدى الشباب .. وتصوير الزواج بالسجن .. والمعركة والقفص والبلوى والمصيبة >>> !!!!

يعني حطوا بمخه الكلام الي هو قاله

فعلا في كثير من الشباب إذا سمع قصة يعتقد إنه لازم يمر فيها بالعكس !!!
الظروف تختلف من شخص لأخر والناس يختلفون بطبايعهم ومواجتهم للمواقف .. وإذا الشي فشل عند فلان وارد راح ينجح عندي .. والمفروض إني ماأعطي إنطباع عن شي وأغرسه في الناس إلا لازم اكون مجربته حتى يكون كلامي واقعي .. ويفيد الناس

وجزاك الله خير على ذكر هذا الحديث إلى المفروض كل الأهل يحطون مقياس لإختيار الزوج ..

[منابر النور]

بوعمار : بإذن الله .. ننتظر العودة

بايعها : جزاكم الله خير على التكملة .. صحيح أعتقد إن الإعلام لعب دور كبير في تشويه نظرة الزواج لدى الشباب .. وتصوير الزواج بالسجن .. والمعركة والقفص والبلوى والمصيبة >>> !!!!

يعني حطوا بمخه الكلام الي هو قاله

فعلا في كثير من الشباب إذا سمع قصة يعتقد إنه لازم يمر فيها بالعكس !!!
الظروف تختلف من شخص لأخر والناس يختلفون بطبايعهم ومواجتهم للمواقف .. وإذا الشي فشل عند فلان وارد راح ينجح عندي .. والمفروض إني ماأعطي إنطباع عن شي وأغرسه في الناس إلا لازم اكون مجربته حتى يكون كلامي واقعي .. ويفيد الناس

وجزاك الله خير على ذكر هذا الحديث إلى المفروض كل الأهل يحطون مقياس لإختيار الزوج ..

[:: YOYA ::]

موضوع مهم 000


1- هل يوجد لدينا غلاء في المهور وفي الطلبات للزواج ؟؟

نعم 000غلاء المهور اصبحت ظاهرة منتشرة الي حد كبير جدا هذه الايام 000


وهل يؤثر على الشباب وعلى المجتمع ؟؟

أكيد بيأثر عليهم 000 وأعتقد ان ذلك من احدي اسباب عدم اقبال الشباب علي الزواج 00والمفروض

اصلا أن أهل البنت يراعو ظروف من يتقدم لابنتهم00 أهم حاجة انه يكون علي دين وخلق

ويستطيع انه يفتح بيت ((من جاءكم من ترضون دينه وخلقه فزوجوه ))000يعني مش لازم المغالاة

في المهور 00والبنت مش بتتوزن بالمال 0


2- لم يتصور بعض الشباب الحياة الزوجية كما تصورها محمد مع إنه لم يجرب الزواج ؟؟


اعتقد أن لذلك أسباب كثيرة منها الاعلام كما قال الاخ بايعها 00كما أن بعض الشباب تكون نظرته

هكذا عن الزواج لانه لايريد ان يتحمل المسؤلية000أو ربما يكون قد رأي بعض نماذج الذين فشلوا

في الزواج فتصبح نظرته هكذا 00


3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟

نعم 000من الافضل ذلك حتي يكون الشاب قد كوّن نفسه فيستطيع أن يفتح بيت و يصرف علي

زوجته وأطفاله فيما بعد 00

4- هل ممكن إن في شباب يتعقدون من هذه المواقف ؟

أكيد طبعا في شباب كتير بيتعقدوا من الزواج بسبب هذه المواقف 0

ومشكووورة اختي منابر النور علي هذا الموضوع 0

[منابر النور]

سؤال إضافي :)

هل المهر يدل على مكانة الفتاة ؟؟؟

[منابر النور]

إختي يويو :)

أسعدتني مشاركتك في الموضوع ..

وبارك الله فيك على الإجابة الوافية ..

وفقك الله ^_^

[almojaded]

والله يوم قريت الموضوع ضحكت شوي

لأن صار معاي نفس الموقف بالضبط امس الخميس :)

انه قاعد بالصالة وخالاتي حوالي يحنون عالزواج

قلت لهم مومشكله ودشووو جووو

افتحوا موضوع المهر والمصاريف طبعاً انه راسي صدع

من المبالغ الخيالية اللي قاعد يقولونها !!! :dope: :freezed:

اللي تقول شبكة بألفين 2000 واللي تقول مهر ب 7 آلاف واللي واللي

المصيبة ان وحده من الاهل قاعدة وبغيت اكلمها على بنتها اني ابيها لي

واهي ساكته .. جان تعطيني القاضية قالت شوف عبدالعزيز

اذا بتزوج بنيه لاتخطبها الا وانت برصيدك 10,000 دينار !!!!!!!!! :whatch: :eek:

قلت لها مومشكله سهالة انه الحين ميمع ميتين دينار 200 لوووووووووول

والباجي على الله

( زين اني مافاتحتها بالموضوع )


لا بس صج الاوضاع كلماله وتصعب للأسوأ

المفروض على اولياء امور البنات يسهلون زواجهم لأن نسبة البنات اكبر

من الشباب بوايد

بعدين اباءنا واجدادنا يوم تزوجوا يمكن كانوا طرق المعاش البسيط والملحق

بالبيت غرفتين وحمام وانتوا بكرامه

بس شقوا دربهم وكافحوا مع بعض وربي فتح عليهم بالهزمن

ودوم اذكر اولياء الامور بحديث النبي-صلى الله عليه وسلم-

( اكثر النساء بركة اقلهن مؤونة )

او كمال قال عليه الصلاة والسلام

والله يوفق اخواني وخواتي طالبين الحلال

لكل خير ويسهل امورهم وين ماكانوا .

[سعودي يحب الكويت]

طيب الموضوع مهم واكثر من مرة طرق طرق جاد ..
اشكر الاخت الكريمة على تذكيرنا به مرة اخرى ..
في الحقيقة من اراد الزواج فان الله تعالى يوفق ويسهل على من طلب النكاح من اجل العفاف كما ورد في الحديث الشريف المتفق على صحتة ..
العبرة اخوتي واخواتي الافاضل ليسة في تكاليف العرس وما الى ذلك وانما العبرة في تحقيق المصالح من الزواج بمعنى انه فيه اناس يتزوجون ولكن لا يرى ذلك في اخلاقهم وتصرفاتهم من عدم الكف عن الامورالمحرمة من مغازل وكلام اخر الليل وما الى ذلك التى كان يفعلها قبل الزواج ومن مقتضيات الزواج في الحقيقة هو ردع هؤلاء عن عن الامور المحرمة ..
العاقل النصيف هو من استفاد حقا من زواجة بحيث انه تعدل سلوكة واستشعر المسولية ,,
من المضحك المبكي في نفس ا تجد شاب يطلق زوجتة بعد مروووور شهرين بحجة انها ليست بيضاء كما ينبغي ..
شكر شكر لكي على الموضوع واسف على التطفل و الاسهاب ....

[بنت الصديق]

1- هل يوجد لدينا غلاء في المهور وفي الطلبات للزواج ؟؟ وهل يؤثر على الشباب وعلى المجتمع ؟؟طبعا يوجد وبكثره ...وأرى في مجتمعاتنا الكثير الكثير...وشي أكيد يؤثر على الشباب والله أكيد أكثر الشباب يتمنى انه يكون متزوج ومستقر وعنده عيال حاله حال غيره ...وده ..بس سبحان اللله تلاقين سبب تأخره والكثير اهوا انه غلاء المهور وهذا النسبه العظمى يعني في أسباب غيرها ...فبالأخير تلاقينه يقول خلاص كرهت الزواج وماني متزوج ...وأمه المسكينه الي قلبها يقوم يعورها عليه ...
الله المستعان

2- لما يتصور بعض الشباب الحياة الزوجية كما تصورها محمد مع إنه لم يجرب الزواج ؟؟الي مثلهم هذولا بيقعدون عزاابيين طول العمر الا إذا تغيرت نظرتهم واقتنعوا أو اذا تلاقين امه تحن عليه وبالأخير يتزوج علشان أمه وبعيش ويا مرته حياة كلها أفكار سلبيه ..دام من الأساس حاط فكرة الزواج براسه انها دوخه وتعب ...فراح يترجم مخه على جذي ماراح تكون حياة مستقره وبيكون متعطف عليها بس علشان امه ....

3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟ شي طبيعي وبديهي أفضل لأنه بيكون حياته أكثر استقرار واطمئنان ..يعني لو ماكان عنده للحين وظيفه وين بيصرف عليها واهوا كل يوم بيقعد ياخذ من أمه وأبوه أصلا حتى اهيا تلاقينها بتستاء ليمن تشوف جذي ...
أعتقد شي ظروري ...ورئيسي

4- هل ممكن إن في شباب يتعقودن من هذه المواقف ؟؟امممممممم اي امبلا في شباب ....يسير معاهم هالشي ....وللأسف العامل الرئيس اهوا هالشي ...

الله يهديهم ...ويحفظ بنات وشباب المسلمين من كل سوء


عذرا عذرا على الإطاله

ومشكوره على الموضوع ...

[بوعمار]

عاد امس ببيت يدي قاعد نتكلم على هالسالفه :)


1- هل يوجد لدينا غلاء في المهور وفي الطلبات للزواج ؟؟ وهل يؤثر على الشباب وعلى المجتمع ؟؟

اي فيه ، وطبيعي انه يؤثر ، لأنه يكسر الظهر خصوصا اللي ميزانيتهم متوسطه ،،



2- لما يتصور بعض الشباب الحياة الزوجية كما تصورها محمد مع إنه لم يجرب الزواج ؟؟

يمكن لأنه مرت عليه تجارب زوجيه كثيره فاشله ، او لضعف قدرته على تحمل المسؤوليه ،،


3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟

في الكويت مو الاحسن ، الا قصبن عنك الا في حالات قليله :)

4- هل ممكن إن في شباب يتعقودن من هذه المواقف ؟؟

اي ، وفي ناس استغفر الله وصلت فيهم الحاله انهم يقولون خلنا عالحرام أحسن ، والعياذ بالله ،،

[منابر النور]

المجدد : آمـــــــــــين .. جزاكم الله خير على المرور والتعقيب .



الله يعين الشباب .. فعلا يمكن يكون هذا السبب في تأخير إما زواج البنت أو زواج الولد




اذا بتزوج بنيه لاتخطبها الا وانت برصيدك 10,000 دينار !!!!!!!!!


بس أعتقد هالمبلغ وايد !!! يعني أنا أشوف إلى تزوجون ألحين أغلبهم يطلبون مهر 5 إلى يعتبرونه معدل طبيعي .. يعني الحكومة تعطي 4 والزوج يضيف لهم .. وانا من رأيي الأفضل يبتعد الزوجين عن العرس إلا هم فيها مصاريف على الفاضي ..!! بس المفروض الشاب يكون اميمع على الأقل
مبلغ يقدر يساعده مو 200 دينار :)




المفروض على اولياء امور البنات يسهلون زواجهم
بعض الأباء عندهم تسهيل زواج بناتهم يعني يبيعها برخيص !!! او غنه قاطها على الريال او إن الريال ماراح يحس بقيمتها .. !!!!




بعدين اباءنا واجدادنا يوم تزوجوا يمكن كانوا طرق المعاش

فعلا وكانت حياتهم بركة ويسر .. وبساطة ..!!



الأهل المفروض إلى خطب بنتهم رجل صالح متدين يشترونه .. لأن هذا أهو المقياس
ومساكين بعض الشباب إذا إدفعوا مهر غالي بعيشون طول عمرهم على الديون ..!!



والله الموفق .. نسأل الله ان يرزق الجميع بالزوجات الصالحة والبنات بالأزواج الصالحين ..

[منابر النور]

سعودي يحب الكويت : جزاك الله خير اخي الفاضل على المرور ..


من اراد الزواج فان الله تعالى يوفق ويسهل على من طلب النكاح من اجل العفاف

صدقت ..

من أهم الامور التوكل على الله ويصدق النية من الزواج .. سيوفقه بإذن الله
لأن بعض الشباب قد يتزوج مثل بقية الناس ..!! دون ان يرغب هو نفسه بالزواج ويشعر بقيمته ..فتجده يفعل الأمور التي ذكرتموها .. ويصل إلى الطلاق بسرعة ..!!




ليسة في تكاليف العرس وما الى ذلك وانما العبرة في تحقيق المصالح من الزواج

قد يحدث العكس في بعض المواقف .. نجد الشاب يرغب بالزواج والعفة لكن تكاليف الزواج تكون عائق بالنسبة له .. قد يضطر لتأخير الزواج ..!! وقد يؤثر سلبا عليه .. !! أيضا كذلك بالنسة للفتيات




والله الموفق ..

[منابر النور]

بنت الصديق : آميييييييين .. حياج الله إختي الكريمة .. أشكرج على المرور التعقيب


تلاقين امه تحن عليه وبالأخير يتزوج علشان أمه وبعيش ويا مرته حياة كلها أفكار سلبيه

فعلا نقطة مهم ومشكلة إذا تزوج الشاب من اجل أمه وموقادر على تحمل المسؤولية ومايرغب في الزواج أصلا ..!! شي أكيد حياته ماراح تكون سعيدة ومستقرة .. !!



يعني لو ماكان عنده للحين وظيفه وين بيصرف عليها واهوا كل يوم بيقعد ياخذ من أمه وأبوه

في ماشاء الله شباب يدرسون ويشتغلون .. بهدف إنهم يبون يتزوجون ويخططون ويمعون ..
ويكون قد المسؤولية لكن أعتقد هالنماذج نادرة .. !! ومو الكل يقدر يتحمل !!


والله الموفق ..

[منابر النور]

بوعمار : حياك الله أخي الفاضل .. وأشكرك على المرور والتعقيب ..



لأنه يكسر الظهر خصوصا اللي ميزانيتهم متوسطه

لازم إلى ميزانيته متوسطه يدور زوجة من عايلة نفس المستوى .. علشان ماينصدم :)
ولوإن ألحين حتى إلى مستواهم متوسط يتشرطون وياخذون مهر خيالي عبالهم كل الشباب
قاعدين على بنق !!..



الله يعين الشباب ..!!




في الكويت مو الاحسن ، الا قصبن عنك الا في حالات قليله

:) صحيح الحياة صارت صعبة .. ومو الكل يقدر يتحمل !! على الأقل مخلص دراسته ومكون نفسه
ويتحمل مسؤولية نفسه وماينطر احد يصرف عليه ..


والله الموفق ..

[بوعمار]

والله يوم قريت الموضوع ضحكت شوي


لأن صار معاي نفس الموقف بالضبط امس الخميس :)

انه قاعد بالصالة وخالاتي حوالي يحنون عالزواج

قلت لهم مومشكله ودشووو جووو





أخيرا بوسعود :)


اشوى ماراحت جهودي هباء :)


قلت لها مومشكله سهالة انه الحين ميمع ميتين دينار 200 لوووووووووول


زين ،،

وانا عندي 50 دينار يعني 250 ، خوش مبلغ :)

[بحريني88]

يعني لو ماكان عنده للحين وظيفه وين بيصرف عليها واهوا كل يوم بيقعد ياخذ من أمه وأبوه

في ماشاء الله شباب يدرسون ويشتغلون .. بهدف إنهم يبون يتزوجون ويخططون ويمعون ..
ويكون قد المسؤولية لكن أعتقد هالنماذج نادرة .. !! ومو الكل يقدر يتحمل !!


..

اصبتي اختي الفاضله، الدراسه ليس مانع وسبب في عدم الزواج ، لاشك ان كان الطالب بإمكانه التوازن بين الدراسه والحياة الزوجية . وان كان يعمل فهذا طيب .. وفيه كسب للمال اي عمل كان في وقت فراغه وبذلك يعيش مرتاح مطمأن البال راضي لربه جل جلاله وتقدست اسمائه .
والله ولي التوفي
والسلام عليكم ورحمة الله وبركاته

[منابر النور]

بحريني : جزاك الله خير اخي الفاضل على التعقيب ..

التوازن بين الدراسه والحياة الزوجية

فعلا نقطة مهمة ومو أي شخص يقدر يتحمل هالمسؤولية .. لكن إذا كانت رغبته قوية طبعا قبلها التوكل على الله إن شاء الله بحقق هدفه


بارك الله فيكم

[design]

1- هل يوجد لدينا غلاء في المهور وفي الطلبات للزواج ؟؟ وهل يؤثر على الشباب وعلى المجتمع ؟؟

بالكويت ماشووف انه عندنا غلاء مهور وبالعكس كثير من الزيجات اللي اعرفها كانت يسيرة
المشكلة تكمن بالتكاليف الشروط الاخرى غير المهر .. نقدر نوفر المهر لكن هناك طلبات تأخر عملية الزواج مثل تكوين الشاب نفسه بحيث يتطلب منه فتح بيت جديد علما بانه شاب في مقتبل العمر وربما طالب فيصعب عليه توفير هذي الخاصية وحتى لو كان موظف ايضا يحتاج توفير البيت ومستلزماته جهد كبير ..



2- لما يتصور بعض الشباب الحياة الزوجية كما تصورها محمد مع إنه لم يجرب الزواج ؟؟
هذي عقلية طفل مراهق لم يعرف معنى الزواج بعد .. وهو في هذا الوقت لا يحتاج الزواج فتلاقيه يقول هذا الكلام من باب جهل .. مافي رجل كامل الرجول وكامل العقل والمنطق والفكر يستطيع ان يعيش من غير زوجة مستحيل .. هذي فطرة مجبول عليها الانسان ..
وكل ماتقدم فيه العمر يجد نفسه اكثر رغبة في تحقيق الزواج لاانه يظل ناقص في حياته ..






3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟

هذي تختلف من بيت لاخر .. بمعنى انه هناك من يستطيع توفير هذا المطلب لولده رغم انه مازال في مرحلة الدراسة .. فالبيت يسع والمصرف موجود والزوجه طالبة ايضا في الغالب والعائلتان متفقتان على هذا الامر منذ البداية ..

وغالبا مايكون الزواج بعد الوظيفة بحكم توفير متطلبات الزواج والمسئوليات .. من بيت ومايحتاج اليه البيت وماتحتاج اليه الزوجة من متطلبات ضرورية وغير ضرورية ولابد من توافرها ..

وايضا الشاب بعد الدراسة والوظيفة يحتاج ايضا للزواج فتكون الرغبة أكثر لتحقيق الاستقرار العاطفي والنفسي والجسدي ..


4- هل ممكن إن في شباب يتعقودن من هذه المواقف ؟؟

في حالات والله اذا تزوج الشاب ومر في علاقة زوجية فاشلة .. او انه الشااب مراهق صغير لايعي ماذا يعني الزواج

5- بالنسبة لزيادة المهر هل له علاقة في الفتاة ؟؟
لا ماعتقد والا أصبحت سلعه يزاد عليها ولا يهتم لامرها لان من يزيد في مهرها هو ابوها وهذا يعني نذير مشاكل قادم ..

ندااااااء من الرسول صلى الله عليه وسلم يا معشر الشبااااااب من استطاع منكم الباءة فليتزوج فانه احصن للفرج واغض للبصر ومن لم يستطع فعليه بالصوم فأن له وجاء ..

ومعوقات الزواج تختلف ليس المهر هو العائق الوحيد ..

[منابر النور]

ديزاين : حياك الله اخي الفاضل .. وجزاك الله خير على المرور


بالكويت ماشووف انه عندنا غلاء مهور

نتمنى ذلك .. في وفي على حسب المستوى المعيشى للأسرة

والفكر يستطيع ان يعيش من غير زوجة

في بعض الشباب يمتنعون عن الزواج بسبب إنهم يبون يبرون امهم ويخافون إذا تزوجوا ينشغلون عنها ..ويظل لما يموت من غير زواج .. إلا يمكن بعد ما تتوفى أمه يدور زوجه يقضى معاها باجي حياته ..

تزوج الشاب ومر في علاقة زوجية فاشلة

صحيح ويمكن يتعقد من بيتهم نفسه يعني يشوف علاقة امه وأبوه فاشله ..
ومافي إستقرار .. فيأثر عليه وعلى نظرة للزواج ..!

ومعوقات الزواج تختلف ليس المهر هو العائق الوحيد ..
صحيح هي مختلفة ..

بارك الله فيكم

[سعودي يحب الكويت]

سعودي يحب الكويت : جزاك الله خير اخي الفاضل على المرور ..


من اراد الزواج فان الله تعالى يوفق ويسهل على من طلب النكاح من اجل العفاف

صدقت ..

من أهم الامور التوكل على الله ويصدق النية من الزواج .. سيوفقه بإذن الله
لأن بعض الشباب قد يتزوج مثل بقية الناس ..!! دون ان يرغب هو نفسه بالزواج ويشعر بقيمته ..فتجده يفعل الأمور التي ذكرتموها .. ويصل إلى الطلاق بسرعة ..!!




ليسة في تكاليف العرس وما الى ذلك وانما العبرة في تحقيق المصالح من الزواج

قد يحدث العكس في بعض المواقف .. نجد الشاب يرغب بالزواج والعفة لكن تكاليف الزواج تكون عائق بالنسبة له .. قد يضطر لتأخير الزواج ..!! وقد يؤثر سلبا عليه .. !! أيضا كذلك بالنسة للفتيات




والله الموفق ..

أوافق و لاأوفق في نفس اللحظة ,,,
يعني جانب اللا موافقة لكلامكي هو انه ان حصل على الفتات الملتزمة و الجميلة وتحقق الذي في نفسة فان ولله الحمد و المنه هناك ابواب كثيرة للحصول على المال , ومنها عندنا في السعودية لجنة راغبي الزواج لجنة خيرية تساعد الشباب على الزواج وايضا مؤسسة ابن باز الخيرية وغيرها ,
واهل الخير كُثر ولله الحمد ..و انما هناك شرط هو (( النية الصالحة )) و الله تعالى تكفل بمن يريد الزواج من اجل العفاف ....
الموافقة لكلامكي هو ان هناك اناس معقدووون جدا اقولها وللاسف وقد يطلبون من الشاب المتقدم لهم طلابات كثيرة وشرو ط مما تعجزة وتثقل كاهلة ,,,
شكر لكي ..

[almojaded]

أخيرا بوسعود :)


اشوى ماراحت جهودي هباء :)



ههههههههههههه

افااا عليك

انا من كثر ما اسمعك تدعولي بالزوجة الصالحة

حسيت بحنين للحياة الزوجية :) ... الله يكتب ويسهل

على طاري الحنين للحياة الزوجية

( هذا خروووج عن النص )

الاسبوع اللي طاف طالع ويا طلال .. عقب العشا .. اتصلت فيني اختي

عزيز اييب حفاظات حق الياهل وانت راد ...

دشيت ويا طلال الجمعية ... شريت حفاظات دارلينغز الوردية مالت الياهال

الحين طلعنه .. العامل حاطهم بالجيس .. لأ .. أنا ظربت معاي الا امشي فيهم

بدون جيس .. يعني من طقة متزوج وشاري حق الولد حفااظات لووووول

وقزرتها مشي لي السيارة بالحفاظات .. مسكين طلال احسه خلاص قام يسقبل

اخبالي ماقام يتكلم هههههههه



وانا عندي 50 دينار يعني 250 ، خوش مبلغ :)

يابعد جبدي يابوعماااار

شغل عدل

لي صاحب عزيز علي .. لمن تزوج كلفه الزواج كله فوق ال 8000 آلاف دينار

دفعهم ابوووه .. لأنه كان توه طالب <------ ما يسلفني ابووه اسبوع وارده ههههههه

والثاني معاي بالدوام .. دق قرظ وتزوج

بس هذا كله احس غلط

عشان جذيه يبيله سنه او سنتين بالكثير لين ايمع واعتمد على نفسي

بعدين اطق بيوت الأوادم

[design]

لوووول المعذره اختنا نوون بس شوي ودنا نتكلم ..


انا بصراحه استغربت منه قط الجيس فجأه وقاال شكوو احطه بجيس خلني امشي فيه جذي ضحكت وسكت شبقوله وبعدين الوقت كان متأخر يعني انا الوحيد اللي بالشارع معاه ^_^
وهو ماشاف اللي معاي ليفه وشامبوات معطره..

بالنهاية اقوول انه ماله عذر الرجل المستطيع انه يقول ماله داعي الزواج او انه يأخر زواجه برا فيه امه ماعتقد يعني بينتظر موتها لين يتزوج الاعمار بيد الله ولو هو بار يحط لها زوجه تؤنس وحشتها وتداريها وتسوولف عليها ..
واما مسئولية هي بالاول والاخير لازم تتزوج ان طال الزمن او قصر فأستغل وقتك بانتقاء الزوجة الصالحة

[فرحه]

وعليكم السلام والرحمة :)

موضوع قيم ( جزاج الله خير )

اول شي حبيت اشكرج عالطرح الحلو والاسلوب الممتاز

ثاني شي ببلش برايي الشخصي :)


الي تفضلتو فيه كان صحيح وتعقيبات الاعضاء بعد صحيحه

والزواج يبي فلوس والمهر ماقام يسوي شي

لان البنات وحده تطالع الي عند الثانية ومايعجبها

وتتكبر عالنعمة ومايعجبها العجب ولا الصيام برجب

وبعضهم ماشاءالله قنوعين ياخذون المهر ( واهو قليل ) وتحمد ربها

وربي يبارك لها ...

والي عندها سنع تسوي بمهرها القليل احسن من الي مهرها وايد

اهو المسأله مسأله حسن تدبير وذوق وسنع بس




والي عنده الصراحه لا يبخل على زوجته ويعطيها الي يكفيها ويزيد

وربي يونسهم بالي عندهم ويبارك لهم

( ونصيحه اذا مهرها كان وايد او شويه لاتعلم احد ) تشتغل سوالف الحريم :)

ان عطاها شوي قالو بخيل وان عطاها وايد قالو غني ويحسدونها :)

وبعدين تشتغل المقارنة هذي عطوها هالكثر وهذي اقل وهذي اكثر




دمتم بحفظ الله ورعايته


وربي يسهل على الي بعدهم ماتزوجو ويعينهم على مصاريف الزواج

ويرزقهم الزوجة السنعة والذرية الصالحه ويمتعهم بالي عندهم ويبارك لهم


اللهم امين



جزاج الله خير منابر النور عالموضوع القيم

[بوعمار]

يعني من طقة متزوج وشاري حق الولد حفااظات لووووول

وقزرتها مشي لي السيارة بالحفاظات ..



عايش الجو :):)




مسكين طلال احسه خلاص قام يسقبل

اخبالي ماقام يتكلم هههههههه


الداد له :) ،،

الظاهر خايف انه يتكلم تقول له اسكت ياولدي :)





لي صاحب عزيز علي .. لمن تزوج كلفه الزواج كله فوق ال 8000 آلاف دينار

دفعهم ابوووه .. لأنه كان توه طالب <------ ما يسلفني ابووه اسبوع وارده ههههههه


بوسعود :الشي اللي تشتريه بفلوسك يكون عزيز عليك

بس اذا يبي يعطينا فماكو مشكله :)



عشان جذيه يبيله سنه او سنتين بالكثير لين ايمع واعتمد على نفسي

ويه ، قلنا بنفرح فيك بالصيف ، بعد العمليه ،،


شكلك ناطر اطلع الليسن علشان بعرسك ......



وهذا اهداء مني لك ولجميع العزوبيه :
http://www.alkhathami.com/up/audio/al3zobiah.mp3

[KaDy]

- هل يوجد لدينا غلاء في المهور وفي الطلبات للزواج ؟؟ وهل يؤثر على الشباب وعلى المجتمع ؟؟
والله يعني بعض الناس يطلبون مهر غالي لكنها الحمدلله ماتمثل ظاهره
لكن هالشي اكيد يأثر عالشباب وهم عالبنات .. تأخر الزواج اعتقد مو شي ايجابي والمفروض المجتمع يقدر هالشي وييسر على الريال الخاطب .. يعني باعتقادي مبلغ 5 الاف خير ونعمه


2- لما يتصور بعض الشباب الحياة الزوجية كما تصورها محمد مع إنه لم يجرب الزواج ؟؟
من القصص الي يسمعها

3- هل من الأفضل للشاب أن يدخل قفص الزوجية بعد إنتهاء الدراسة وإستلام الوظيفة ؟؟
اي افضل طبعا بحيث يكون واعي وقد المسؤوليه ومكون نفسه .. يعني المفروض الواحد يصبر شوي على ما يتيسر له الامر لان العجله بدون استعداد مو زينه ..


4- هل ممكن إن في شباب يتعقدون من هذه المواقف ؟؟
طبعا بس ميخالف الحياة تجارب والخيره فيما اختاره الله وكل واحد ماياخذ الا نصيبه

[منابر النور]

سعودي يحب الكويت : صدقت أخي الفاضل ..

وجزاكم الله خير على المرور ..

نسأل الله التوفيق للجميع

[منابر النور]

لي عودة http://talk.fanateq.com/vb/images/icons/icon10.gif

أشكركم على التفاعل ..